Sunday, April 30, 2006

مخنـــــــــــــوق

لو كنت يوم مخنوق وحاسس ان الدنيا ضاقت بيك ومش عارف تعمل ايه جديد اغسل وشك والبس هدومك وانزل على القهوه حتلاقى ناس كتير منهم اللى بيتكلم فى السياسه عن قانون الطوارىء واللى بيحصل واللى حايقولك اننا لازم نعمل حاجه علشان نبقى ايجابيين وحناخد موقف وناس تانيه حتكلمك وتقولك اننا بعدنا عن ربنا وحنتناقش جامد وحانحس وقتها اننا الوحيدين اللى قادرين نفهم اللى بيحصل واننا احسن ناس وحتدخل مجموعه بنات حلوه حنكمل معاهم المناقشه وبعدين الكلام حيتقلب عن الاحساس بالوحده واننا لازم نعرف بنات جداد وحناخد نمر تليفوناتهم علشان لما نرجع بيوتنا نكلمهم ( ده لو كنت سعيد الحظ) وحتنتهى الحكايه كلها بمكالمات بليل مع البنات وتنتهى الحكايه وننام سعداء علشان نصحى تانى يوم نقول الحكومه مدت قانون الطوارىء سنتين ونتكلم عن العباره واللى ماتوا والفتنه الطائفيه والمؤامره الدوليه على منطقة الشرق الاوسط ونام شويه تانين بعد الظهر ونقوم من النوم حاسين اننا مخنوقين و الدنيا ضاقت بينا و................
معلش كان نفسى اتكلم فى موضوع تانى بس انا مخنوق

1 Comments:

Blogger saekomology said...

انت عارف ايه الى بيخلينا فجاه نحس اننا مخنقوين وبس.... كده بدون اى مقدمات عشان كل الحجات الى المفروض نتخنق منها بقه خلاص عادى لا احتجاجك وتعبيرك عن غضبك ولا حتى محاوله تفريغ الغضب ده (عشان اساسا مش حتعرف تفرغ الغضب ده) ان الناس تكدب عادى ان واحد يدى واحد على قفاه بدون سبب عادى برضه . ان احنا نتعايش مع كل الحجات الى تخنق عشان خلاص بقت عادى وعلى فكره لما تنزل على القهوه كل الى حتقبلهم هناك اتحركو من بيوتهم ولبسوا هدومهم ونزلوا القهو عشان مخنقوين كده من غير سبب وعشان ده بقه عادى فتنزل القهوه تتكلم تشوف ناس برضه مخنوقه تدخل فى مناقشه مع حد وتتنرفز معاه لمجرد انو كلام وهو يتنرفز عليك بقه عادى مع تحياتى للمخنوق ........العادى
سكومولوجى

10:09 AM  

Post a Comment

<< Home